Ħal għargħur

Merħba

Dan l-aħħar kien hemm kontroversja twila fuq xi gazzetti lokali dwar l-isem: Għargħur jew Gargur?

Rekords qodma bħal-Lista tal-Milizja (1419-20) u l-iktar dokumenti parrokkjali tal-bidu jirreferu għalih bħala Casali Grigori, Casal Gregorio, Casal Gargur. F’ċertu mapep ta’ dawk iż-żminijiet jidher bħala San Gregorio, jew Gregorio, jew Galgour. Matul il-ġrajja, il-Maltin kellhom devozzjoni popolari lejn San Gregorju l-Kbir. u fir-raħal tagħna fejn Tal-Ferħa kien hemm kappella ddedikata lilu, imsemmija minn Mons.Dusina (1575). Anke llum il-ġurnata fil-viċinanzi ftit mill-għelieqi huma magħrufin bħala “ta’ Girgor”.

MIll-1419-20 l-isem inkiteb b’ħafna varjazzjonijiet min-nutura u kittieba tal-istorja. Agius de Soldanis issemmih Gargur u Għargħur; Il-Lexicon ta’ Vassalli jinkludi fih Għargħur, Gregorius, Gregorio, Ħal Għargħur (kolonna 321). Warajh Ħal Għargħur ħa spinta ‘l quddiem, għalkemm Gargur kien għadu popolari sat-Tieni Gwerra Dinjija. Illum il-ġurnata f’dokumenti uffiċċjali nsibuh bħala Ħal Għargħur. L-opinjoni ta’ dawk li jħobbu l-istorja għadha maqsuma. Oħrajn jippreferu jsegwu l-preferenza sentimentali tagħhom.

Ħal Għargħur huwa wieħed mill-iżgħar irħula f’Malta b’arja ta’ madwar 2 kilometri kwadru u popolazzjoni ta’ madwar 2,773 ruħ. Il-karatteristika tiegħu hija dik ta’ villaġġ rurali bejn in-Naxxar u l-Madliena, fuq in-naħa tal-Lvant u l-Punent. Il-lokalita’ hija eżempju tipiku ta’ villaġġ li sa llum għadu mdawwar b’żoni rurali ta’ art agrikola u fertili. Din il-lokalita’ toffri sens ta’ serħan u atmosfera serena b’abbandun ta’ żoni naturali mimlija b’art imħaddra. Ħal Għargħur għadu natura ta’ delineazzjoni madwar ir-raħal kollu u li tiddistingwieh mill-kumplament tal-lokalitajiet l-oħra. Dan il-villaġġ igawdi minn ambjent rurali fejn wieħed għandu jipproteġi u jikkonserva.

Il-parti urbana ta’ Ħal Għargħur hija fil-biċċa l-kbira tagħha residenzjali u fil-qalba tar-raħal issib bi prominenza l-pjazza u l-knisja tal-lokal. L-attivitajiet kummerċjali u dawk ta’ xiri huma kollha limitati fiċ-ċentru u fil-parti ta’ madwar il-knisja.

Wieħed jista’ jsib uħud mill-aqwa prattiċi u eżempji ta’ valur ekoloġiku f’Ħal Għargħur. Dawn jinkludu Wied Anġlu, Wied il-Faħam, Wied ta’ Santa Marija taż-Żellieqa, Wied ta’ Piswella, Wied ta’ Santa Katerina u Wied id-Dis. Il-Great Fault ukoll jgħaddi mil-limiti ta’ Ħal Għargħur. Ħal Għargħur infatti jinsab fuq żona għolja mill-art u l-pożizzjoni prominenti tiegħu li jagħti għal fuq il-kosta ta’ Baħar iċ-Ċagħaq huwa ideali bħala l-post fejn bħalissa hemm il-Broadcasting Transmission Station (qabel magħruf bħala l-Ex-Naval Signal Station. Il-Victoria Lines (1870-1899), huma parti mir-raħal ukoll bħala xempju storiku b’potenzjal ta’ rikreazzjoni u turiżmu.

Aqra iktar,,,,,