In-Naxxar

Ġrajjietha

In-Naxxar huwa mibni fuq għolja fil-parti tat-Trammuntana ċentrali u jkopri 11 km2 ta’ art u popolazzjoni ta’ aktar minn 14-il elf persuna. In-Naxxar huwa post antik u jmur lura għal żmien il-preistorja. Fih insibu cart ruts (raddi tal-karettun), oqbra Puniċi u katakombi skoperti f’numru ta’ postijiet.

Wisq probabli li n-Naxxar ħa ismu minn Nawfraġju ta’ San Pawl f’Malta. It-tradizzjoni tgħid li n-nies tan-Naxxar kienu l-ewwel nies li taw l-għajnuna tagħhom meta l-bastiment inkalja. Aktar tard San Pawl ikkonverta lir-residenti ta’ dak iż-żmien għal Kristjaneżmu. Għalhekk ħafna nies jorbtu lin-Naxxar ma’ Nassar li eventwalment tfisser ‘konverżjoni għall-Kristjaneżmu’. It-teorija tagħmel aktar sens permezz tal-motto ‘Prior Credidi’ li tfisser ‘L-ewwel nies li emmnu’.

Għalkemm in-Naxxar jidher purament post residenzjali, il-mixjiet fih juru xort’oħra. Fil-pjazza ewlenija tan-Naxxar, insibu Palazzo Parisio u l-knisja Parrokkjali, waqt li fil-parti l-antika niltaqgħu ma’ numru ta’ toroq dojoq u djar tipiċi li jagħmlu n-Naxxar wieħed pittoresk.

Il-lokalita’ tkopri ċ-ċentru tan-Naxxar, il-parti tas-Sgħajtar, Santa Marija tax-Xagħra, San Pawl tat-Tarġa, Birguma, Magħtab, Salina, Baħar iċ-Ċagħaq u parti mill-Madliena.