Pembroke

Ġrajjietha

Pembroke ħa l-oriġini tiegħu mill-Kavallieri ta’ San Ġwann ta’ Ġerusalem li bnew żewġ Torrijiet tal-Għassa mal-kosta, li servew bħala mezz ta’ difiża għall-Port il-Kbir minħabba l-pożizzjoni strateġika tiegħu. Madanakollu, is-Servizzi Ingliżi kienu strumentali fl-iżvilupp u l-fortifikazzjoni ta’ Pembroke.

L-ewwel barrikati prinċipali nbnew bejn l-1859 u l-1862 u kienu msemmija għall-Qaddis Patrun tal-Ingilterra – San Ġorġ. Barrikati oħrajn inbnew aktar tard u kienu msemmijin għall-Qaddisin Patruni tal-Irlandu u l-Iskozja – San Patrizju u Sant’ Andrija. Il-Forti ta’ Pembroke nbena bejn l-1875 u l-1878 biex iservi bħala difiża, l-aktar biex jissalvagwardja l-approċċ fuq il-baħar lejn il-Port il-Kbir u biex jiddefendi in-naħa tal-lemin tal-Victoria Lines. Aktar ‘ il quddiem, il-Pembroke Battery ġiet mibnija bejn l-1897 u l-1899 biex isservi għall-istess raġuni.

Reġimenti varji servew ġewwa Pembroke u l-aħħar suldati telqu minn Pembroke fl-1979. Matul it-Tieni Gwerra Dinjija, Priġunieri tal-Gwerra Ġermaniżi kienu msakkrin Pembroke u matul iż-żmien li kienu hemm, bnew kappella żgħira li serviet għall-bżonnijiet tas-Servizzi Ingliżi.

Minn dak iż-żmien, l-art li kienet mixtrija mis-Servizzi Ingliżi mal-wasla tagħhom Malta ngħatat lura lill-Gvern Malti. Għall-ftit tas-snin, Pembroke kien abbandunat iżda f’nofs it-tmeninijiet, il-barrikati kienu kkonvertiti f’residenzi privati, uffiċini u kumpless turistiku. Fl-istess żmien, il-Gvern ħareġ għall-bejgħ plots biex jinbnew u jinxtraw, u l-ewwel residenti bdew joqogħdu hemm fl-1986.

Matul is-snin li ġejjin, Pembroke għandu jara influss ikbar ta’ residenti hekk kif il-programm ta’ estensjoni tal-housing miexi ġmielu.

Bis-saħħa tal-Att tal-Kunsilli Lokali (1993), Pembroke kien wieħed mis-67 lokalitajiet li kellu l-Kunsill Lokali tiegħu. L-ewwel elezzjoni saret is-Sibt 19 ta’ Marzu 1994. Minn dak iż-żmien saru tmien elezzjonijiet oħrajn fl-1996. 1999, 2002, 2005, 2008, 2013 u 2019. L-elezzjoni li jmiss hija fl-2024.